Seithfed Cynhadledd Flynyddol Cymdeithas Ryngwladol y Comisiynwyr Iaith
Medi 9, 2022
Bilbao, Gwlad y Basg – Clowyd seithfed cynhadledd flynyddol ryngwladol a chyfarfod cyffredinol blynyddol Cymdeithas Ryngwladol y Comisiynwyr Iaith (IALC) heddiw yn Bilbao, Gwlad y Basg. Nid oedd y gymdeithas wedi dod ynghyd wyneb yn wyneb ers cyn cyfnod pandemig COVID-19.
“Wedi dros dair blynedd ar wahân, roedd y gynhadledd a’r cyfarfod cyffredinol yn gyfle i aelodau ailgysylltu ac ail-ymroi i’n cenhadaeth i gefnogi a gwella hawliau, cydraddoldeb ac amrywiaeth ieithyddol ar draws y byd,” medd Raymond Théberge, Comisiynydd Ieithoedd Swyddogol Canada sy’n gorffen ei gyfnod fel Cadeirydd IALC.
Yn ystod y gynhadledd deuddydd, cynhaliodd y grŵp sesiynau a phaneli trafod yn mynd i’r afael ag amryw o bynciau, gan gynnwys effaith pandemig COVID-19 ar y comisiynwyr iaith ac ar hawliau ieithyddol, yr heriau a’r cyfleoedd mae’r cyfryngau cymdeithasol yn eu cynnig, lle ieithoedd swyddogol yng ngwaith ombwdsmyn, yr heriau wrth gyflawni mandad comisiynydd iaith, a rheoli ymchwiliadau’n effeithiol wrth ddelio â phwysau allanol.
Yn ystod y cyfarfod cyffredinol, cytunodd aelodau’r gymdeithas, yn rhan o’u cynllun gwaith nesaf, i sefydlu categori aelodaeth arsylwi er mwyn caniatáu i awdurdodaethau nad ydynt yn bodloni’r gofynion aelodaeth penodol gymryd rhan yng ngweithgareddau IALC.
Cyhoeddwyd hefyd yn y cyfarfod cyffredinol mai Comisiynydd y Gymraeg fydd yn gyfrifol am gadeiryddiaeth ac ysgrifenyddiaeth y gymdeithas dros y flwyddyn sydd i ddod.
