1. ᐊᑏᑦ
   ᑲᑐᔾᔨᖃᑎᒌᑦ ᑕᐃᔭᐅᓂᐊᖅᑐᑦ ᐃᒫᒃ :
   ᓯᓚᕐᔪᐊᒥ ᑲᑐᔾᔨᖃᑎᒌᑦ ᐅᖃᐅᓯᕐᓄᑦ ᑲᒥᓯᓇᐃᑦ
2. ᑐᕌᒐᖏᑦ
   ᑐᕌᒐᖏᑦ ᑲᑐᔾᔨᖃᑎᒌᑦ ᐃᒪᐃᓐᓂᐊᖅᑐᑦ:
   • ᓴᖅᑭᔮᖅᑎᑦᓯᓂᕐᒥᑦ, ᐃᑲᔪᖅᑐᓂᕐᒥᑦ ᓯᕗᒧᐊᑦᑎᑦᓯᓂᕐᒥᓪᓗ ᐅᖃᐅᓯᕐᓄᑦ ᐱᔪᓐᓇᐅᑎᓂᑦ ᐊᔾᔨᒌᑎᑦᓯᓂᕐᒥᑦ ᐊᔾᔨᒌᖏᕈᓘᔭᕐᓂᕐᒥᓪᓗ
   • ᖃᐅᔨᒪᑎᑦᓯᓂᕐᒥᑦ ᖃᐅᔨᒪᔭᒥᓂᑦ, ᖃᓄᐃᓕᐅᕈᑕᐅᔪᓐᓇᖅᑐᓂᑦ ᐊᑦᑐᐊᓂᓕᓐᓂᓪᓗ ᐊᑯᕐᖓᓂᑦ ᐅᖃᐅᓯᕐᓄᑦ ᑲᒥᓯᓇᐃᑦ ᐊᓪᓚᕝᕕᖏᓐᓂᑦ
   • ᑎᓕᐅᕆᓂᕐᒥᑦ ᑐᑭᓯᒋᐊᕈᑎᓂᑦ ᑕᐅᖅᓰᖃᑎᒌᓐᓂᕐᒥᑦ ᐃᓕᓐᓂᐊᕐᓂᕐᒥᓪᓗ ᐊᑯᕐᖓᓂᑦ ᐅᖃᐅᓯᕐᓄᑦ ᑲᒥᓯᓇᐃᑦ ᐊᓪᓚᕝᕕᖏᓐᓂᑦ ᐊᑐᐃᓐᓇᐅᑎᑦᓯᓂᕐᒥᓪᓗ ᐊᖅᑯᑎᒥᑦ ᐃᓚᒋᔭᐅᔪᓄᑦ ᓯᕗᒧᐊᑦᑎᓯᓂᕐᒥᑦ ᐱᐅᓂᖅᐹᑎᒍᑦ ᐊᑐᖅᑕᐅᔪᓐᓇᖅᑐᓂᑦ ᐊᒻᒪᓗ ᓴᓐᖏᓂᖅᓴᒥᑦ ᖃᐅᔨᒪᓂᖃᕐᓂᖅ ᑐᓐᖓᕕᒋᓗᒋᑦ ᐅᖃᐅᓯᕐᓄᑦ ᐱᔪᓐᓇᐅᑏᑦ ᓴᐳᔾᔨᓂᕐᒥᑦ ᐱᓕᕆᐊᕆᔭᐅᓚᓱᒃᑐᓂᑦ;
   • ᐅᓄᖅᓯᑎᑦᓯᓂᕐᒥᑦ ᖃᐅᔨᒪᑎᑦᓯᓂᕐᒥᑦ ᑐᑭᓯᐅᒪᑎᑦᓯᓂᕐᒥᓪᓗ ᑲᒪᒋᔭᖏᓐᓂᑦ ᐊᒻᒪᓗ ᐱᒻᒪᕆᐅᑎᑕᖏᓐᓂᑦ ᐅᖃᐅᓯᕐᓄᑦ ᑲᒥᓯᓇᐃᑦ ᒐᕙᒪᒃᑯᓐᓂᑦ, ᐊᕕᑦᑐᖅᓯᒪᔪᓄᑦ ᑐᑦᑕᕐᕖᑦ, ᐃᓕᓐᓂᐊᕐᓂᓕᕆᓂᖅ, ᐱᕙᓪᓕᐊᔪᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ;
   • ᓇᓗᓇᐃᖅᓯᑦᓯᐊᕐᓂᕐᒥᑦ, ᓴᖅᑭᑎᑦᓯᓂᕐᒥᑦ ᐱᓯᒪᑦᓯᓂᕐᒥᓪᓗ ᕿᒥᕐᕈᔭᐅᖏᓐᓇᑎᓪᓗᒍ ᒪᓕᒐᑦᓴᐃᑦ ᐃᓕᑕᕆᔭᐅᓂᖏᓐᓂᑦ ᐅᖃᐅᓯᕐᓄᑦ ᑲᒥᓯᓇᐃᑦ ᐊᓪᓚᕝᕕᖏᑦ ᑲᑐᔾᔨᖃᑎᒌᓄᑦ ᐊᒻᒪᓗ ᐊᖏᖃᑎᒌᓐᓂᕐᒥᓪᓗ ᐃᓕᑕᕆᔭᐅᓂᖏᓐᓂᑦ ᓈᒻᒪᒋᔭᐅᔪᓂᑦ ᓇᓗᓇᐃᖅᑕᐅᓯᒪᔪᓂᑦ ᒪᓕᒐᑦᓴᕐᓂᑦ ᐃᓕᑕᕆᔭᐅᓂᖏᓐᓄᑦ ᐅᖃᐅᓯᕐᓄᑦ ᑲᒥᓯᓇᐃᑦ ᓯᓚᕐᔪᐊᕐᒥᑦ;
   • ᐃᑲᔪᖅᑐᓂᕐᒥᑦ ᐊᕕᑦᑐᖅᓯᒪᔪᓂᑦ ᓴᖅᑭᑎᑦᓯᒍᒪᔪᓂᑦ ᐃᓂᒋᔭᐅᔪᒥᑦ ᐅᖃᐅᓯᕐᓄᑦ ᑲᒥᓯᓇᒥᑦ ᓯᕗᒧᐊᑦᑎᑦᓯᓂᕐᒥᓪᓘᓐᓃᑦ ᐅᖃᐅᓯᕐᓄᑦ ᐱᔪᓐᓇᐅᑎᓂᑦ;
   • ᖃᐅᔨᒪᑎᑦᓯᓂᕐᒥᑦ ᐃᓕᓐᓂᐊᑎᑦᓯᓂᕐᒥᑦ ᐱᕚᓪᓕᑎᑦᓯᓂᕐᒥᓪᓗ ᐃᖅᑲᓇᐃᔮᓄᓪᓘᓐᓃᑦ ᑕᐅᖅᓯᖃᑎᒌᓐᓂᕐᒥᑦ ᐱᕕᖃᕐᓂᕐᒥᓂᑦ;
   • ᖃᐅᔨᒪᑎᑦᓯᓂᕐᒥᑦ ᓴᖅᑭᑎᑦᓯᓂᕐᒥᑦ ᑐᓐᖓᕕᒋᓗᒋᑦ ᖃᐅᔨᓴᕐᓂᐅᔪᑦ ᐱᔪᒪᔪᓄᑦ ᓯᕗᒧᐊᑦᑎᓯᓂᕐᒥᑦ ᐅᖃᐅᓯᕐᓄᑦ ᐱᔪᓐᓇᐅᑎᓂᑦ.
3. ᓇᓗᓇᐃᔭᐃᓂᖅ
   ᐃᓚᒋᔭᐅᔪᑦ ᑲᑐᔾᔨᖃᑎᒌᓄᑦ ᑐᕌᖓᓚᖓᔪᑦ ᐅᑯᓄᖓ :
   1. ᐅᖃᐅᓯᕐᓄᑦ ᑲᒥᓯᓇᐃᑦ ᑭᒡᒐᖅᑐᖅᑕᐅᓯᒪᔪᖅ ᒪᑐᐃᖅᑕᐅᓂᖓᓂᑦ ᑲᑎᒪᓂᐅᑉ ᑲᑐᔾᔨᖃᑎᒌᓄᑦ ᑕᑉᓚᓐ, ᐊᐃᕈᓚᓐᒥᑦ 24 ᒪᐃ 2013 ᐊᖏᖃᑎᖃᕈᑎᓪᓗ ᒪᓕᒐᕐᓂᑦ ᑲᑐᔾᔨᖃᑎᒌᑦ ᐋᖅᑭᑦᑕᐅᓯᒪᓂᖏᓐᓂᑦ.
   2. ᐅᖃᐅᓯᕐᓄᑦ ᑲᒥᓯᓇᐃᑦ ᐊᓪᓚᕝᕕᖏᑦ ᐃᓕᑕᕆᔭᐅᓯᒪᔪᐃᑦ ᑲᑐᔾᔨᖃᑎᒌᓄᑦ ᓈᒻᒪᒋᔭᐅᔪᓂᑦ ᑲᑐᔾᔨᖃᑎᒌᓄᑦ ᒪᓕᒐᑦᓴᓂᑦ ᐃᓕᑕᖅᓯᓂᕐᒥᑦ ᐅᖃᐅᓯᕐᓄᑦ ᑲᒥᓯᓇᐅᑉ ᐊᓪᓚᕝᕕᖓᓂᑦ. ᒪᓕᒐᑦᓴᓂᑦ ᐃᓚᓕᐅᔾᔭᐅᓯᒪᔪᑦ.
4. ᐱᓕᕆᔩᑦ
   1. ᑲᑐᔾᔨᖃᑎᒌᑦ ᐃᑦᓯᕙᐅᑕᖃᕐᓂᐊᖅᑐᑦ ᐊᓪᓚᑦᑎᖃᕐᓗᑎᓪᓗ. ᐃᑦᓯᕙᐅᑕᖅ ᐃᓚᒋᔭᐅᒋᐊᓕᒃ ᑲᑐᔾᔨᖃᑎᒌᓄᑦ.
   2. ᐃᑦᓯᕙᐅᑕᖅ ᐊᓪᓚᑎᖓᓗ ᐊᑐᓂᑦ ᑐᑦᓯᕋᐅᑎᐅᓂᐊᖅᑑᒃ, ᐊᐃᑉᐱᖅᑕᐅᓗᑎᒃ ᐊᒻᒪᓗ ᓂᕈᐊᖅᑕᐅᓗᑎᒃ ᑲᑐᔾᔨᖃᑎᒌᓄᑦ ᑲᑎᒪᔨᐅᔪᓄᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓂᖏᓐᓄᑦ ᓂᕈᐊᖅᑕᐅᓯᒪᖏᓐᓇᓚᖓᔪᑦ ᐱᔭᕇᖏᓐᓂᓕᒫᖓᓂᑦ ᑭᖑᓪᓕᕐᒥᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓕᖅᒥᑉᐸᑕ ᓄᖅᑲᖅᓂᐊᖅᑎᓪᓗᒍ. ᐃᓂᒋᔭᐅᔪᑦ ᓄᖅᑲᖅᑐᓄᑦ ᐊᓯᖏᓐᓄᓪᓘᓐᓃᑦ ᐃᓂᑖᕆᔭᐅᔪᓐᓇᖅᑐᑦ ᑲᑐᔾᔨᖃᑎᒌᑦ ᐃᓱᒪᖅᓱᓐᓂᐊᖅᑐᑦ. ᓄᖅᑲᓯᔪᖅ ᐃᑦᓯᕙᐅᑕᖅ ᐊᓪᓚᑎᓪᓘᓐᓃᑦ ᐱᔪᓐᓇᓂᖃᕆᐊᓕᒃ ᓂᕈᐊᖅᑕᐅᑲᓐᓂᓂᕐᒥᑦ ᐊᐃᑉᐸᖓᓄᑦ ᐃᓱᓕᕝᕕᑦᓴᖓᓄᑦ ᑭᓯᐊᓂ ᐃᓂᒋᔭᕐᒥᓃᒋᐊᖃᖏᑦᑐᖅ ᒪᕐᕉᓐᓄᑦ ᑭᖑᓕᕇᓄᑦ ᐃᓱᓕᕝᕕᑦᓴᓕᓐᓄᑦ. ᖃᓄᖅᑑᕈᑎᐅᓂᐊᖅᑐᑦ ᒪᓕᓪᓗᒋᑦ ᓂᕈᐊᕐᓂᐅᔪᑦ ᐊᒥᓲᓂᖏᓐᓄᑦ ᑲᑎᒪᔩᑦ ᐅᐸᑦᓯᒪᔪᑦ.
   3. ᓱᓕᒃᑲᓐᓂᖅ ᐱᓕᕆᔩᑦ - ᓯᑕᐅᒪᐅᓗᑎᒃ ᓈᓴᐅᑎᑎᒍᑦ - ᐃᓚᒋᐊᖅᑕᐅᔪᓐᓇᖅᑐᑦ ᑲᑐᔾᔨᖃᑎᒌᓄᑦ ᐱᔭᐅᔭᕆᐊᖃᕋᐃᑉᐸᑕ.
5. ᐃᓚᒋᔭᐅᔪᑦ
   1. ᐃᓚᒋᔭᐅᔪᑦ ᓇᓗᓇᐃᖅᑕᐅᔪᓐᓇᖅᑐᑦ ᒪᓕᓪᓗᒋᑦ ᒫᓐᓇᐅᔪᖅ ᒪᓕᒐᐃᑦ ᐊᒻᒪᓗ ᑲᑐᔾᔨᖃᑎᒌᑦ ᒪᓕᒐᑦᓴᐃᑦ ᐃᓕᑕᕆᔭᐅᓂᕐᒧᑦ ᐅᖃᐅᓯᕐᓄᑦ ᑲᒥᓯᓇᐃᑦ ᐊᓪᓚᕝᕕᖏᑦ ᐃᓚᓕᐅᔾᔭᐅᓯᒪᔪᑦ.
   2. ᑲᑐᔾᔨᖃᑎᒌᑦ ᖃᓄᖅᑑᕈᓐᓇᖅᑐᑦ ᒪᓕᓪᓗᒋᑦ ᑐᑦᓯᕋᐅᑏᑦ ᐃᓚᒋᔭᐅᒍᒪᓂᕐᒧᑦ ᐊᒥᓲᓂᖏᓐᓄᑦ ᓂᕈᐊᕐᓂᐅᔪᑦ ᑲᑎᒪᔨᓄᑦ ᐅᐸᑦᓯᒪᔪᓄᑦ.
   3. ᐊᓪᓚᑎ ᐱᓯᒪᑦᓯᖃᑦᑕᕐᓂᐊᖅᑐᖅ ᒫᓐᓇᓕᑕᕐᓂᑦ ᑎᑎᕋᖅᓯᒪᔪᓂᑦ ᐃᓚᒋᔭᐅᔪᓂᑦ ᑲᑐᔾᔨᖃᑎᒌᓄᑦ.
6. ᐃᓚᒋᔭᐅᔾᔪᑎ
   1. ᐊᑐᓂᑦ ᐃᓚᒋᔭᐅᔪᑦ ᐊᑭᓖᓂᐊᖅᑐᑦ ᐊᑕᐅᓯᐊᕐᓗᑎᑦ ᐃᓚᒋᔭᐅᔾᔪᑎᓂᑦ ᐊᑭᖃᕐᑐᓂᑦ €10 ᑎᑎᕋᖅᑕᐅᓂᖏᓐᓄᑦ ᐃᓚᒋᔭᐅᔾᔪᑎᖏᑦ.
   2. ᖃᑦᓯᐅᓂᖏᑦ ᐃᓚᒋᔭᐅᔾᔪᑎᖃᑲᓐᓂᕐᓃᑦ, ᓴᖅᑭᖅᒥᐊᖅᐸᑕ, ᓇᓗᓇᐃᖅᑕᐅᖃᑦᑕᕐᓂᐊᖅᑐᑦ ᑲᑐᔾᔨᖃᑎᒌᓄᑦ.
7. ᓄᖅᑲᕐᓂᖅ
   ᐃᓚᒋᔭᐅᔪᖅ ᓄᖅᑲᑎᑦᓯᔪᓐᓇᖅᑐᑦ ᐃᓚᒋᔭᐅᔾᔪᑎᒥᑦ ᑎᑎᖅᑲᑎᒍᑦ ᖃᐅᔨᒃᑲᖅᑕᐅᓂᖏᓐᓂᑦ ᑲᑐᔾᔨᖃᑎᒌᓄᑦ ᓄᖅᑲᕐᓂᕐᒥᑦ.
8. ᓄᖅᑲᖅᑎᑕᐅᓂᖅ
   ᑲᑐᔾᔨᖃᑎᒌᑦ ᐱᔪᓐᓇᕐᓂᖃᕐᓂᐊᖅᑐᑦ ᓄᖅᑲᖅᑎᓯᓂᕐᒥᑦ ᐃᓚᒋᔭᐅᔪᒥᑦ, ᐃᓱᒪᒋᔭᖏᑦᑎᒍᑦ, ᐃᓚᒋᔭᐅᔪᖅ ᑲᑎᑎᑦᓯᒍᓐᓇᖏᓐᓂᖓᓂᑦ ᒪᓕᒐᑦᓴᕐᓂᑦ ᐃᓕᑕᕆᔭᐅᓂᕐᒥᑦ ᐃᓚᒋᔭᐅᓂᕐᒧᑦ. ᒪᕐᕉᒃ-ᐱᖓᓱᓪᓗ ᐊᒥᓲᓂᖏᑦ ᐃᓚᒋᔭᐅᔪᑦ ᐱᔭᕆᐊᖃᖅᑐᑦ ᓄᖅᑲᑎᑦᓯᓂᕐᒥᑦ.
9. ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓂᖓ
   1. ᑲᑐᔾᔨᖃᑎᒌᑦ ᑲᒪᒋᔭᖃᕐᓂᐊᖅᑐᑦ ᐊᕐᕌᒍᑕᒪᖅᓯᐅᑎᒥᒃ ᑲᑎᒪᓂᖓᓂᑦ ᐅᐸᓪᓗᑎᒃ ᐅᕝᕙᓘᓐᓃᑦ ᖃᕆᑕᐅᔭᑎᒍᑦ ᐊᑐᓂᑦ ᐊᕐᕌᒍ ᓅᑎᑦᓯᓂᕆᔭᐅᔪᒥᑦ ᐱᓕᕆᐊᑦᓴᓄᑦ ᐅᑯᓄᖓ :
      1. ᐱᒐᔭᕐᓂᕐᒥᑦ ᐃᑦᓯᕙᐅᑕᐅᑉ ᐅᓂᒃᑳᓕᐊᒥᓂᖏᓐᓂᑦ ᓱᓕᕆᓂᐅᔪᓄᑦ ᑲᑐᔾᔨᖃᑎᒌᑦ ᑭᖑᓂᑦᑎᓐᓂᑦ ᐊᕐᕌᒍᒻᒧᑦ;
      2. ᓂᕈᐊᕐᓂᕐᒧᑦ ᐃᑦᓯᕙᐅᑕᕐᒥᑦ ᐊᓪᓚᑦᑎᒥᓪᓗ ᑭᖑᓂᖓᒍᑦ ᐊᕐᕌᒍᒻᒥᑦ;
      3. ᐊᖏᖃᑎᒌᓐᓂᕐᒥᑦ ᐱᓕᕆᐊᖃᕐᓂᕐᒧᑦ ᐸᕐᓇᐅᑎᓄᑦ ᑲᑐᔾᔨᖃᑎᒌᓄᑦ ᑭᖑᓂᑦᑎᓐᓂᑦ ᐊᕐᕌᒍᒻᒧᑦ;
      4. ᐊᖏᖃᑎᒌᓐᓂᕐᒥᑦ ᓈᒻᒪᑦᑐᓂᑦ ᐱᓕᕆᐊᑦᓴᐅᔪᓂᑦ ᓴᖅᑭᔮᖅᑎᑦᓯᓂᕐᒥᑦ ᑐᕌᒐᖏᓐᓂᑦ ᑲᑐᔾᔨᖃᑎᒌᑦ.
   2. ᐊᓪᓚᑦᑎ, ᐅᐸᑦᓯᒪᑎᓐᓇᒍ ᐊᓪᓚᑦᑎ, ᐃᓚᒋᔭᐅᔪᑦ ᑲᑐᔾᔨᖃᑎᒌᓄᑦ, ᑲᑎᒻᒪᔪᑎᓂᑦ ᑎᑎᕋᕐᓂᐊᖅᑐᖅ ᐊᕐᕌᒍᖅᓯᐅᑎᒥᒃ ᑲᑎᒪᓂᖏᓐᓂᑦ ᑐᓂᐅᖅᑲᐃᓂᐊᖅᓱᓂᓗ ᑕᖅᑭᖅ ᓈᓯᒪᑐᐃᓐᓇᓕᖅᑎᓪᓗᒍ ᑲᑎᒪᓂᕐᒥᑦ.
   3. ᑲᒥᓯᓇᐅᓯᒪᔪᖅ ᖃᐅᔨᓴᖅᑎᐅᒍᓂᓘᓐᓃᑦ, ᖃᐅᔨᒪᔭᐅᑦᓯᐊᕐᓗᓂᓘᓐᓃᑦ ᐃᓄᒃ, ᐃᓱᒪᒋᔭᖏᓐᓂᑦ ᑲᑐᔾᔨᖃᑎᒌᑦ ᐃᑲᔪᕈᓐᓇᖅᑐᖅ ᐱᓕᕆᐊᖏᓐᓄᑦ, ᖃᐃᖁᔭᐅᒍᓐᓇᖅᑐᖅ ᐊᕐᕌᒍᒪᖅᓯᐅᑎᒥᒃ ᑲᑎᒪᓂᖏᓐᓄᑦ ᐊᓯᖏᓐᓂᓪᓘᓐᓃᑦ ᑲᑎᒪᓂᖏᓐᓄᑦ ᑲᑐᔾᔨᖃᑎᒌᑦ. ᑕᒪᓐᓇ ᐊᑑᑎᖃᕐᒥᔪᖅ ᖁᑦᓯᑦᑐᒥᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᓂᑦ ᐅᖃᐅᓯᖃᖅᑐᑦᓂᑦ ᐊᒥᓱᓂᑦ ᑕᑯᑦᓴᐅᑎᑦᓯᔪᓂᑦ ᐱᐅᔪᒥᑦ ᐃᓚᒋᔭᐅᔪᒪᔪᓂᑦ ᐅᖃᐅᓯᕐᓄᑦ ᑲᒥᓯᓇᐅᑉ ᐱᓕᕆᕝᕕᐊᓂᑦ.
10. ᐅᖃᐅᓰᑦ
    ᖃᓪᓗᓈᑎᑐᑦ ᐱᓕᕆᖃᑦᑕᕐᓂᐊᖅᑐᑦ ᑲᑐᔾᔨᖃᑎᒌᑦ ᑎᑎᕋᖅᑕᐅᓯᒪᔪᑦ ᑐᑭᓕᐅᖅᑕᐅᖃᑦᑕᕐᓂᐊᖅᑎᓪᓗᒋᑦ ᐃᓚᒋᔭᐅᔪᓄᑦ ᐃᓕᑕᕆᔭᐅᓯᒪᔪᑦ ᐅᖃᐅᓯᖏᓐᓂᑦ. ᐃᓚᒋᔭᐅᔪᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᐊᖏᖃᑎᒌᒍᑎᓂᑦ ᐃᓕᑕᕆᔭᐅᓯᒪᔪᑦ ᐅᖃᐅᓯᖏᓐᓂᑦ ᐅᖃᐅᓯᕐᓂᓪᓘᓐᓃᑦ ᓂᕈᐊᖅᑕᖏᓐᓂᑦ ᐃᓚᒋᔭᐅᓗᑎᑦ ᑲᑐᔾᔨᖃᑎᒌᑦ ᐃᑭᐊᖅᑭᕕᖓᓂᑦ. ᑲᑎᒪᓂᖏᑦ ᑲᑐᔾᔨᖃᑎᒌᑦ ᖃᓪᓗᓈᑎᑑᖃᑦᑕᕐᓂᐊᖅᑐᑦ ᐃᓕᑕᕆᔭᐅᓯᒪᔪᓪᓗ ᐅᖃᐅᓯᖏᓐᓂᑦ ᐊᐅᓚᑦᓯᔨᐅᔪᑦ ᐃᓂᒋᔭᐅᔪᓂᑦ.
11. ᐋᖅᑭᒋᐊᖅᑕᐅᓂᖏᑦ ᒪᓕᒐᐃᑦ ᒪᓕᒐᑦᓴᐃᓪᓗ
    1. ᒪᓕᒐᐃᑦ ᐃᓚᓕᐅᔾᔭᐅᓯᒪᔪᑦ ᒪᓕᒐᕐᓄᑦ ᐋᖅᑭᒋᐊᖅᑕᐅᒍᓐᓇᖅᑐᑦ ᐱᖁᔨᕗᖔᕈᑎᒃᑯᑦ ᐊᕐᕌᒍᖅᓯᐅᑎᒥᒃ ᑲᑎᒪᓂᖏᓐᓂᑦ ᐊᑐᐃᓐᓇᐅᑎᑦᓯᓂᕐᒥᑦ ᐱᖁᔨᕗᖔᕈᑎᓂᑦ ᓈᒻᒪᒋᔭᐅᑉᐸᑦ ᐊᒥᓱᓄᑦ ᐃᓚᒋᔭᐅᔪᓄᑦ ᐅᐸᑦᓯᒪᔪᓄᑦ.
    2. ᐋᖅᑭᒋᐊᑦᑕᐅᔪᑦ ᒪᓕᒐᐃᑦ ᐋᖅᑭᑦᑕᐅᓯᒪᓂᖏᓪᓗ ᐱᒋᐊᑦᓴᐅᑎᒋᒐᔭᖅᑐᑦ ᐊᑐᓕᖅᑎᑕᐅᑎᓪᓗᒍ ᑲᑐᔾᔨᖃᑎᒌᓄᑦ, ᐊᓯᐊᒍᑦ ᐅᖃᐅᓯᕆᔭᐅᓯᒪᖏᑉᐸᑦ ᑲᑐᔾᔨᖃᑎᒌᓄᑦ.

ᐃᓚᓕᐅᔾᔭᐅᓯᒪᔪᖅ ᒪᓕᒐᐃᑦ

ᒪᓕᒐᑦᓴᐃᑦ ᐃᓕᑕᕆᔭᐅᓂᖏᓐᓄᑦ ᐃᓚᒋᔭᐅᓂᕐᒥᑦ

1. ᐊᑐᐊᒐᖃᕆᐊᖃᕐᒪᑕ ᐃᓚᒋᔭᐅᔪᓄᑦ
   ᒪᓕᑦᑕᐅᓂᐊᖅᑐᑦ ᐊᑐᖅᑕᐅᕙᓪᓗᑎᑦ

   ᑲᑐᔾᔨᖃᑎᒌᑦ ᐃᓕᑕᖅᓯᓂᐊᖅᑐᑦ ᐅᖃᐅᓯᕐᓄᑦ ᑲᒥᓯᓇᓂᑦ ᐃᓚᒋᔭᐅᔪᓂᓪᓗ ᑲᑐᔾᔨᖃᑎᒌᓄᑦ ᑖᒃᑯᓄᖓ ᑎᒥᐅᔪᓄᑦ ᑲᒪᒋᔭᖏᑦ ᐃᓚᒋᔭᓖᑦ ᐃᓚᖏᓐᓂᑦ ᐃᓘᓐᓇᖏᓐᓂᓪᓘᓐᓃᑦ ᐅᑯᓂᖓ : ᖃᐅᔨᓴᕐᓂᕐᒥᑦ ᐋᖅᑭᑦᓯᓂᕐᒥᓪᓗ, ᓇᓗᓇᐃᖅᓯᓂᕐᒥᑦ ᖃᓄᐃᖁᔨᓂᕐᒥᓪᓘᓐᓃᑦ ᐱᔾᔪᑕᐅᓗᓂ ᐅᖃᐅᓯᓕᕆᓂᕐᒨᖓᔪᓂᑦ ᐅᓂᕐᓘᑎᓂᑦ ᑕᐃᒃᑯᓗᖓ ᐊᓪᓚᕝᕕᖏᑦ ᐱᔪᓐᓇᖅᑎᑦᓯᕚᓪᓕᓂᕐᒥᑦ ᖃᐅᔨᓴᕐᓂᕐᒥᑦ ᐅᕝᕙᓘᓐᓃᑦ ᐊᐅᓚᓂᖃᖅᑐᓂᑦ ᒪᓕᓪᓗᑎᑦ ᐅᖃᐅᔾᔨᓂᕐᒥᓪᓘᓐᓃᑦ ᐱᔨᑦᓯᕋᕐᓂᕐᒥᑦ ᐱᔾᔪᑎᒋᓗᒋᑦ ᐅᖃᐅᓯᕐᓄᑦ ᐱᔪᓐᓇᐅᑏᑦ ᐊᒻᒪᓗ ᐱᓕᕆᐊᑦᓴᖏᑦ.

   ᐃᓚᒋᔭᐅᔪᑦ ᓴᓂᕐᕙᑦᑕᐅᓯᒪᖏᑦᑐᖅ ᑕᐃᒃᑯᓄᖓ ᑕᐃᔭᐅᓂᖏᓐᓄᑦ ᐃᓚᓕᓐᓄᑦ ‘ᐅᖃᐅᓯᕐᓄᑦ ᑲᒥᓯᓇ’ ᑲᑐᔾᔨᖃᑎᒌᓪᓗ ᐱᖃᓯᐅᔾᔨᖏᑦᑐᑦ ᐃᓚᒋᔭᐅᔪᓂᑦ ᖃᐅᔨᓴᖅᑎᐅᓂᕐᒧᑦ ᐊᔾᔨᒐᓚᖏᓐᓂᓪᓘᓐᓃᑦ ᐊᓪᓚᕝᕕᓐᓂᑦ ᐅᖃᐅᓯᕐᓅᖓᔪᓂᑦ ᐅᓂᕐᓗᑎᐅᓯᒪᔪᓂᑦ ᑲᒪᒋᔭᖃᕐᓂᕐᒥᑦ ᒪᓕᑦᓯᐊᕐᓂᒥᓪᓘᓐᓃᑦ ᐱᔨᑦᓯᕋᕐᓂᕐᒥᑦ ᐱᒻᒪᕆᐅᑎᓪᓗᒍ ᑎᓕᔭᐅᓯᒪᓂᖏᓐᓄᑦ ᐃᓗᓕᓗᐊᑕᖏᓪᓘᓐᓃᑦ ᐱᓕᕆᐊᖏᑦ ᐱᔨᑦᓯᕋᕐᓂᕐᒥᑦ ᑕᑯᓐᓇᓂᕐᒥᑦ ᐃᓱᒫᓘᑎᓂᑦ ᐅᖃᐅᓯᕐᓄᑦ ᐱᔪᓐᓇᐅᑎᓂᑦ.

   ᒪᓕᒐᑦᓴᐃᑦ
   
   ᑲᑐᔾᔨᖃᑎᒌᑦ ᐱᔾᔪᑎᒋᔭᖏᓐᓄᑦ ᒪᓕᒐᑦᓴᐃᑦ ᐃᓕᑕᕆᔭᐅᓂᖏᓐᓄᑦ ᐅᖃᐅᓯᕐᓄᑦ ᑲᒥᓯᓇᐃᑦ ᐊᓪᓚᕝᕕᖏᑦ ᐃᒪᐃᑉᐳᑦ :

   ᖃᓄᐃᓕᐅᖅᑎᐅᓂᒧᑦ - ᖃᐅᔨᓴᖅᑎᐅᓂᕐᒧᑦ, ᒪᓕᑦᓯᐊᕆᐊᖃᕐᓂᕐᒧᑦ ᐅᖃᐅᔾᔨᓂᕐᒧᓪᓘᓐᓃᑦ ᐱᔨᑦᓯᕋᕐᓂᕐᒥᑦ ᐅᖃᐅᓯᕐᓄᑦ ᐱᔪᓐᓇᐅᑎᓄᑦ ᐱᓕᕆᐊᑦᓴᖏᓐᓄᓪᓗ
   ᐃᓛᒃᑰᕈᓐᓇᓂᕐᒥᑦ - ᐃᓛᒃᑯᕐᓂᕐᒥᑦ ᑲᔪᓯᑎᑦᓯᓂᕐᒥᑦ ᑲᒪᒋᔭᖏᓐᓂᑦ
   ᐊᔾᔨᒌᑎᑦᓯᓂᕐᒥᑦ - ᐊᖏᖅᓯᒪᓂᖃᕐᓂᕐᒥᑦ ᓇᓗᓇᐃᖅᓯᓂᕐᒥᑦ ᐊᔾᔨᒌᑎᑦᓯᓂᕐᒥᑦ ᐱᒻᒪᕆᐅᓂᖓᓄᑦ
   ᓱᓕᑦᓯᐊᖅᑐᒥᑦ - ᐊᑐᕆᐊᓕᖏᓐᓂᑦ ᐊᐅᓚᓂᕆᔭᖏᑦ
   ᑕᑎᒋᔭᐅᒍᓐᓇᓂᕐᒥᑦ - ᑕᑎᒋᔭᐅᓂᕐᒥᑦ ᑭᒃᑯᑐᐃᓐᓇᕐᓄᑦ ᓈᒻᒪᑦᑐᓄᓪᓘᓐᓃᑦ ᒪᓕᒐᓕᐅᖅᑎᓄᑦ

   ᐊᐅᓚᑦᓯᔾᔪᑏᑦ

   ᑲᑐᔾᔨᖃᑎᒌᑦ ᓂᕆᐅᒋᔭᖃᖅᑐᑦ ᐅᖃᐅᓯᕐᓄᑦ ᑲᒥᓯᓇᐃᑦ ᐊᓪᓚᕝᕕᖏᑦ ᒪᓕᒋᐊᖃᕐᓂᖏᓐᓂᑦ ᐋᖅᑭᑦᓯᔾᔪᑕᐅᓯᒪᔪᓂᑦ ᐱᔾᔪᑎᒋᔭᖏᓐᓄᓪᓗ ᐱᐅᔪᒥᑦ ᐊᐅᓚᑦᓯᓂᕐᒥᑦ ᑲᔪᓯᑎᑦᓯᓂᕐᒥᑦ ᑲᒪᒋᔭᖏᓐᓂᑦ ᐊᒻᒪᓗ ᐱᔭᕆᐊᖃᕐᓂᐅᔪᓂᑦ ᒪᓕᒐᕐᑎᒍᑦ ᑐᓐᖓᕕᓕᓐᓂᑦ.

   ᐃᓕᑕᕆᔭᐅᓂᖅ

   ᖃᓄᖅᑑᕐᓂᖅ ᐅᖃᐅᓯᕐᓄᑦ ᑲᒥᓯᓇᐅᑉ ᐊᓪᓚᕝᕕᖓ ᐃᓕᑕᕆᔭᐅᓯᒪᑉᐸᑦ ᑲᑎᑎᑦᓯᓂᕐᒥᑦ ᒪᓕᒐᑦᓴᕐᓂᑦ ᐃᓚᒋᔭᐅᓂᕐᒥᑦ ᑲᑐᔾᔨᖃᑎᒌᓄᑦ ᐃᓱᒪᒋᔭᖏᓐᓂᑦ ᑲᑐᔾᔨᖃᑎᒌᑦ.